محطات تراثية رباعية محكية ~

~
برقوقة البنجر المزروعه باب الدار ، لف الزمن عليها ياما و دار
بقت تلقط حمل جمل وتزيد ، صارت ما تشبع العصفور و الشنار
ساق الله ع العنب اللي مغمس كبريت ، بقت الدوالي سياج حوالين البيت
والقطف بقى قد راس العجل ويزيد ، سبحان ما بقى يا قطف و بقيت
اهتزت الأرض وربت لما شقع المزراب
وطلع عشب وحنّون ولبست الأرض أبهى الثياب
عامره و معمره بالعز والإنسان والخيرات
وطاب العيش فيك يا بلادي طاب
شفت جحش بِجُر في الأرض عود ، صَدَّت السِكَّه وصارت في الأرض تنود
ها لأرض قديش مشتاقه للحرات ، بس القلب عاف ووهنِتْ الزنود
كردوشنا من طحين الذُره مخبوز ، وبجرة الفخار بنضرب الكوز
وقعده بحا كورتنا المليانه شجر ، بنوكل برقوق وبنطقش لوز
بقت المقثاه ع مد النظر وتطول ، فيها الفقوس والبندوره والبطيخ تلول
وريحة الشمام عابقه بالجو ، ما أحلاها سروه والنبت مبلول
الخابيه مليانه قمح ورغيفنا بأمان ، و ع فوقها رجم البصل رفيق الزمان
ووراها جرار الزيت مطينه .........، مونه للسنه يا فرحة الإنسان
بحس الأرض بتغني للشتا والمطر ، بحسها بتناغي النبت والشجر
ولمّا تلبس ثوبها لِخضر القشيب ،جنات بتشوفها ع مد النظر
الذيب طمس ع الغنم ونط من فوف الصيره ،
والراعي طافش ع وجهه و الجلا برات الديره
يا ريت الراعي الخاين توكله ذياب الفلا
قبل ما توكل الذياب من غنمنا الشياه الخيره
لمّا لحصيني فكر يقحم خُم ستي ويُخطف جاجه
لقي الفخ والجفت وسيدي والصخب واللجاجه
فر لحصيني يتدعثر من الخوف بحجار الصوّان
طول عُمر اللي بحرس حاله من حاله ما راحت له حاجه_______________________________
إنَّ حـــزناً ســاعـةَ المـــوت ِ أضعافَ سرور ساعة َ الميلاد ...

طبعا قصة منقولة

المهم انها قصة من ايام زمان

والله انا مش عارف هي قصه ولا ايش

للامانه خربشتني

بكل الاحوال مشكور لما اشوفك احكيلي مغزاها

تقبلش مروري

اشكرك اخي الكريم على النقل الممتع

واشكرك على المرور الدائم

نورتي اختي

اشكرك اخ علي علي موضوعك بس والله الخط مو واضح
تقبل مروري

حياك الله منور متصفحي ابو عمي

وبالنسبة للخط منقول من المصدر نصا حرفا

بدك ما تواخنا

حاكوره الكوز نطقش لوز الخابيه المقثاه طافش الجفت

يعني هالموضوع بنفع ينحط في قاموس المنتدى

على قد ما فيه مصطلحات فلاحيه

مشكور على النقل الحلو

تقبل مروري

اهلين بيكي

الحمد لله ما ظل اشي عندي اضيفة على القاموس

نورتينا بمرورك على متصفحي

نهارك سعيد